Quiz online per l Ann cumemoratif 2009

De nuvëmber dl 2008 iela tan inant: da tlo mpo à i mutons y i jëuni dai undesc ai dejedot ani dl Trentin, de Südtirol y dl Bundesland Tirol la puscibeltà de fé pea te internet al quiz online per l Ann cumemoratif 2009. Harald Angerer dl Istitut Pedagogich per la grupa de rujeneda tudëscia y Josef Oberhofer dla Lia per natura y usanzes de Südtirol (Heimatpflegeverband) se à studià ora n cunzet inuvatif che se desferenzieia fundamentalmënter dai juesc a quiz per jëuni. L quiz sun internet per l Ann cumemoratif 2009 ne sarà nia n juech multiple-choice cun respostes drët - falà, ma se damanda dai partezipanc al juech respostes criatives, tëutes de pusizion y minonghes mutivedes. Cërta mpustazions dl problem po mé unì afruntedes deberieda, donca en cunlaurazion (online) cun d`autri cumpanies de juech.

L juech ie partì ite te trëi fases cunliëdes una ndolautra, che se desferenzieia te n livel de deficultà defrënt tla mpustazion dl problem. Duc i duviers ie metui adum da na nfurmazion prinzipela che n chërda sun l vidrel te na forma multimediela. Per fé chësc iel liams cun nfurmazions plu a puntin. Mplu iel a despusizion aiuc per ruvé ala soluzion, soluzions y cumentars di autri cumpanies de juech coche nce istruzions per la mpustazion dl probelm.
 
I jugadëurs valutea un cun l auter si soluzions y partësc ora ponc de tlassifica. La soma di ponc abinei adum fej ora la situazion dl juech y ie ala fin dla finedes determinënta per la devënta o la desfata. I jugadëurs che à plu ponc vën nultima valutei da na giuria, che abina ora chi che à venciù danter duc canc. La premiazion vën fata per doi categuries d`età, uniuna per jugadëurs singuli y per grupes de juech. I cumpanies de juech à ziam la puscibeltà de se mëter adum te grupes de juech. La prima fasa dl quiz mët man de nuvëmber dl 2008 y dura nchin de jené dl 2009. De fauré y de merz dl 2009 iel la segonda fasa dl quiz, de auril y de mei dl 2009 iel la terza fasa. Ala fin de mei iel l cunferimënt di pesć ai vencënc.