"syndrome 09": l ie pià via l juech a pesć online per l ann cumemoratif

L juech "syndrome 09" ie unì nvià via dala Lia per natura y usanzes (Heimatpflegeverband) de Südtirol, che à laurà ora l juech sun ncëira dla Repartizion ala Cultura tudëscia y Familia y ie unida cunsiëda dal Istitut Pedagogich tudësch y dala Intendënzes per la scoles. L juech – mbalucà ite te cunties emuzionëntes y te n scenar futuristich fantasiëus – dë ti dé ala junanza na vijion sëura d’uni sort de ciamps tematics: dala cultura al’architetura, dala sciënzes natureles ala cunescënzes de nosc ncësa y l ambiënt.

Acumpaniëi dala schirlata Flich muessa i jugadëures se deriejer te n mond duminà da n virus che muda, l sindrom. Chësc à ciucià su dut cant l savëi dla persones y i jëuni y la jëunes, metui y metudes adum te grupes, muessa śën cialé, tres n lëur de tuéda, de l recostruì. "L juech online ie na maniera particulera y defin criativa per ti jì permez al ann cumemoratif 2009 y nëus son dla minonga che propi nsci pò la junanza se dé ju plu saurì cun la storia, cun l presënt y l daunì dl Tirol ", spliega l’assessëura pruvinziela ala cultura Sabina Kasslatter Mur.

La grupa de destinazion dl juech ie jëuni y jëunes dai undesc ai dejenuef ani, che muessa se dé ju cun tesć, fotografies, documënc sun vëta y videos. "Ulon stimulé la junanza a se dé ju criativamënter y autonomamënter y a crì soluzions al juech y nsci al ann cumemoratif 2009", nsci dij l’assessëura pruvinziela. L juech ie oradechël unì metù adum nsci che l pò nce unì adurvà per lezions de scola.

A Burnech à ncuei i prims sculeies dl Nordtirol y de Südtirol bele pudù purvé ora l juech, che ie śën da abiné te internet (www.syndrome09.net). Nchin de mei pòssen jughé, daldò – y cun doi premiazions danterite – iel de biei pesć che aspieta sun i miëures jugadëures: bonns per n viac, mini-laptops, bonns per articuli sportifs, libri o DVDs.

Funtana: LPA